正籌備申請成為“美食之都”嘅澳門,各國美食應有盡有,單係同"雞"相關嘅美食,各適其適,你諗得到嘅,澳門都搵得到!不如睇下小編下面嘅推薦幫唔幫到手啦。
葡國雞
相信大家都知,葡國雞係澳門土生菜,發源於澳門,喺葡國係食唔到架。呢道經過數百年演變,揉合廣東、葡國、東南亞、印度等元素嘅菜色,有椰汁、香料同雞的奇妙搭配,絕對值得一試! 雞蛋仔
無雞蛋,又點會有雞先~雞蛋仔作為風靡幾代人嘅街頭美食,唔止夠本土,直頭係集體回憶!一底外脆內軟、香甜撲鼻嘅雞蛋仔,又點可以錯過? 椰汁雞麵
三盞燈一帶有唔少緬甸歸僑聚居,亦開咗唔少食店,品嚐正宗緬甸美食就最好不過。其中一個最出名嘅,一定係椰汁雞麵,淡淡嘅椰香同咖哩香,配合滑而不膩嘅油麵,包你食過返尋味! 椰汁糯米雞
小編講緊嘅唔係熱辣辣,用荷葉包嘅糯米雞,而係用蕉葉包嘅椰汁糯米雞。澳門除咗多緬甸歸僑,其實印尼歸僑都唔少。呢個印尼小食,糯米煙韌得嚟又有香濃椰汁味,加埋入面帶有少少薑味嘅雞絲餡,唔知岩唔岩心水?
除咗椰汁糯米雞外,印尼嘅咖喱雞(上)同甜豉油雞(左下)都值得一試㗎。
白切雞
白切雞呢款傳統粵菜,賣點就係原汁原味,無添加。大家可能會話,係屋企都食得多,不過小編就覺得,燒臘鋪的特製蘸醬都係精髓,當然更重要嘅係唔洗自己動手煮喇!
文章来源于网友发布,如有侵权请联系删除。本文仅代表作者观点,不代表大湾网的观点立场。
|